.

.

الأربعاء، 6 سبتمبر، 2017

انا ممتن

انا ممتن لرنيما
النسخة الاخري مني
اللي بقدر اكون تافهه جدا وساذجة جدا
ومبفكرش في اي شيء
بقدر اكون مرتاحة جدا ومبسوطة جدا
ومنورة جداً
انا ممتنة للحظات اللي بلاقي فيها رنيما
وللاحضان الطويلة التي لا تنتهي ابداً
وللاماكن السعادة
وقدرتها انها تنور عالمي
وتحدف فيه شوية جلاتر وشوية سعادة
وتمشي وتسبني مش مصدقة
اني حاسة اني علي قيد الحياة
ولو لوقت قصير

انا ممتن لأميرة
وانها بتقدر تشوف كل الاشياء اللي انا مبقدرش اشوفها
كل الاشياء اللي بحلم تكون فيا
وانها بتقدر تكون الجانب المشرق للعتمة
علشان بمبسط لما اتكلم ولما احكي
حتي من غير ما الاقي حل او اتوصل لشيء
انا بقصر مع أميرة بس هي عمرها ما بتعتبني
وبتقدر أن ده اسوء وقت بيعدي عليا

انا ممتن ليو
وانها عمرها ابداً ما بتحكم عليا
وانها بتسبني براحتي
وبتحسسني اني حر
اني اخد قرارات او اني اعمل حاجات نفسي فيها
ممتن لوجودها
حتي لو بدأت اهرب منها قليلاً
حتي لو بطلت ابعتلها رسايل
او اطمن عليها

انا بالكاد بحاول انجو
بالكاد بحاول اتنفس
وبالكاد بحاول اشوف الجانب المشرق
او اكون ممتن
بحاول محسش ان لوحدي
وبحاول مغرقش في احساسي بالذنب
بحاول انسي
وبحاول مهتمش
وبحاول اهرب

انا ممتن لمر
بالرغم انها عمرها ما هتبعتلي رسايل
انا ممتن انها لسه بتستناني اجي
من حين لاخر
ولسه بتبقي موجودة علشاني
بالرغم اني عمري ما ببقي موجودة علشانها

انا ممتن لسهيلة : )
انا بقالي كتير متعرفتش علي حد
وكنت مهتمة اني اعرف تفاصيله
او اني احب تفاصيله
وانا مطمنة وبحاول بس ابقي انا
اتعرف عليهم واتقبلهم واحبهم
وشكراً انك قديتي معايا العيد
بتكلمي معايا في اشياء مش مهمة : )
وبتكوني لطيفة معايا علي الاقل

انا ممتن  لساريت
ولحلم ايرلندا
ولقدراتنا اننا نسيب كل شيء ونجازف
ونجري ورا الحب
ساريت هتفضل للابد 
انا في مكان تاني في العالم
كل الاشياء اللي بمر بيها
وكل الحاجات الحلوة اللي ممكن تحصل للواحد
انا ممتنة ان في مكان او شخص 
في هذا الكون يرحب بيا بدون تردد 
واني عند حد يفهمني 
ويحسسني حلو عن نفسي 
ويتكلم معايا بالساعات

انا ممتن لسمية
علشان بتاخدني من ايدي
وانا واقفة علي ارض من اسمنت
قدماي متحجرتين 
ولا احد يستطيع نزعي مما انا فيه

انا ممتن لماما
حتي لو انا عمري 
ما بحس اني باخد 
اهتمام كامل منها
قدرتي اني احط راسي علي كتفها
واسرح في اي حته
وهي قاعدة علي التويتر 
بالكون
وهي بتحكيلي اشياء عن عالمها
حتي وهي بتهرب مني


ليست هناك تعليقات:

إرسال تعليق

لا تقسوا عليّ .. وابتسم للحياة : )))))