.

.

السبت، 30 يناير 2016

انا والخروج

كل يوم في الكلية
وانا بصحي بدري
وبنزل بدري
ببص علي نفسي
في مراية بير السلم
واقول
انا مش مصدقة
اني لببست وهنزل
كل يوم بندهش
النهاردة اكتشفت
ان الكلية ميغيرتنيش هنا
انا مش بنزل
غير لو حد زقني
الشتا تقيل
والتفكير في كم اللبس
اللي ممكن نلبسه
مرهق
انا مبزهقش من البيت
مبزهقش يا جدعان
الخروج حلو
انا بحب اخرج
انا بس بحب
حد يزقني

مر

اكتشفت اليوم
اني بواجه صعوبة
اني ابقي الناس في حياتي
لوقت طويل
ولقيت ان مر
اكتر شخص فضل صديقي
علي مدار 7 سنين
وانها اكتر حد قضيت وقت معاه
بعد اهلي طبعا
وان مش المفروض يبقي فيه اهم
من مر
نظرا لانها من القليلون
اللي مش حاولوا ولا مرة يمشوا
ولا مرة يقطعوا علاقتهم بيك
مش المفروض الجامعة تبقي اهم من مر
لان الحياة من غير مر بعد الجامعة
هتبقي مزرية
شكرا انك لسه صحبتي
برغم كل شيء
انك مش بتضايقي من صوتي العالي
وعمري ما بحس انك بتنقديني في دماغك
علشان بقول اي كلام بفكر فيه
خصوصا لو حاجه بتضحك
علشان انتي دايما بتضحكي
علي كل شيء بقوله
انا ممتن جدا اننا صحاب
واؤكد لك اننا هنفضل صحاب
يسعد يومك يا صديقتي

الجمعة، 29 يناير 2016

احلام

اقولك الحقيقة
انا عاوزة اشتغل في مزرعة
في الريف
ولما ازهق
اخ شنتطتي علي كتفي
وادور اكتب
من غير شغل
من غير فلوس
واكل فاكهة من الشجر
امشي بدون خوف
بدون وجهة
الرجل الذي حقق احلامي

حب وقبول واطمئنان

نحن نملك القليل من الحب
بيوجع
اننا ندعي
ان ربنا يرزقنا المزيد من الحب
المزيد من القبول
والمزيد من الاطمئنان 

الحب

كل ما تحتاجه
ان تطمئن
ان تجد صحبة تحبك
ان تحافظ علي القلوب
التي توضع بين يديك
وان تبادلهم الحب
لا تغيب
ولا تترك المسافات
تجرفك بعيدا
شكرا مر

قاعدة رقم مبعدش

الزق في الناس
اللي لسه مستحمينك
اللي بيحبوك
وانت شخصية مش تتحب
اللي بيستحملوا انك كائن عاطفي
تحتاج ان تعامل برفق
الزق في الناس اللي شبهك
واللي بيحبوا يقضوا وقت معاك
فالنفترض
ان فيه شخص واحد علي هذا الكوكب
بيحبك
ده كفاية
شكرا مر

الثلاثاء، 26 يناير 2016

الاشياء التي لم تحدث

الحاجات 
اول لما بتخلص
بتبقي اكنها محصلتش
والذكريات كلها بتبقي معدتش عليا
الترم اللي فات محصلش
فرح وحنة للا محصلوش
سفر مر محصلش
سفر للا ورجوعها وسافرها
محصلش
2015 محصلتش 
ولا 2014 ولا 2013
ولا اي سنة فاتت
ولا اي شيء كان بيعني لي
اي شيء حصل

كل الحاجات مش مقنعة 
ومفيش ولا حدث مقنع كفاية
انك تصدق انه حصل فعلا

شكراً ترم اذهب ولا تعد
تف علي الترم 

الاثنين، 25 يناير 2016

توثيق

انا بقالي كام يوم
كالعادة
بعمل شير
لصور كتير للقدس
وخاصة طبعا
قبة الصخرة
النهاردة
مامت كاثرين
كتبتلي كومنت
انها متعرفش حاجه عن التاريخ فلسطين
بس هي شايفة ان اللي بيحصل
في فلسطين ده مش عدل
وانها حبه تقرأ اكتر عن الموضوع
وبعدها بدقايق
كانت حماة لويزا
اللي هي اخت كاثرين
بعتتلي مقالة عن فلسطين
وانها مضايقة
اننا مضطرين نتعامل مع طاغية
زي نيتنياهو

اعتقد ده شيء نايس هوووهووو
يحسب في صالح السنة الجديدة

مدي ادراكك

يهمني
انك تبقي مدرك
للاشياء الغلط 
اللي بتعملها 
اكتر من انك مش قادر تبطلها

الادراك نقطة ايجابية
لا يجب التوقف عندها
ولا تستطيع التقدم بدونها

ادارك الاشياء اللي متعرفهاش
الاشياء اللي انت عاوز تعملها
الاشياء اللي عاوز تعرفها
الاشياء اللي عاوز تشوفها
ادراكك للاشياء الغلط
اللي سهل تبطلها
والاشياء الغلط اللي لسه قلبك
متعلق بيها
ادراكك للاشياء الغلط
اللي انت بتعملها وانت مش عارف انها غلط

انا بحب الادراك
والاشخاص المدركين

توثيق اليوم: مامت كاثرين، ساريت، مر وانا

الحاجات اللي بنحب نقرأ عنها
تاريخ إنجلترا
تاريخ فلسطين
والتاريخ عامة
والديانات
الامراض النفسية
والنظريات
انا ومر  
بندور حولين نفس المواضيع
من اول لما عرفتها
بنحب نقرأ عن نفس المواضيع

النهاردة توصلت
انك محتاج 
تبقي عارف 
كل شيء عن معركتك
لو انت مش عارف 
مين هيعرف

ساريت اليوم
طبعا كمصدر معلومات مهم جداً
بيبعتلنا فيديوهات
وبيحب يقرأ تقريبا عن نفس الحاجات
اللي بنحب نقراها
بعتت لنا فيديو
عن تاريخ فلسطين 
إن إنجلش
انا عمري ما قرأت او سمعت تاريخ بالانجلش
بعتنا الفيديو لمامت كاثرين
لانك لازم توري الناس
التاريخ من وجهة نظرك انت
واتستمتعنا انا ومر بالفيديو

كل يوم بنلاقي خيط جديد
زي مفتاح 
لبيت مليان اوض
وبنفتح الاوض ونقضي فيها وقت

سواء كورسات علم نفس الاونلاين
او فيديوهات لناس 
نسمعهم 
مقالات او مواقع قريبة لقلوبنا

شكراً ساريت علشان انتي علي طول الخط
موجودة علشانا
ومامت كاثرين علشان خلتنا نسمع
تاريخ إن إنجلش
ولمر علشان هي احسن صديقة علي وجهة الارض
احسن حد يحكيلك فيديوهات
يعملك سرش علي جوجل
يترجملك ويصلحلك كلامك
واكتر صديقة مساندة علي وجهة الكرة الارضية

مر:  انا اسفة علي احلامك السيئة 
اللا واعي بيخرف : )

معرض الكتاب 2

وحدي
في معرض الكتاب
اسير ببطئ
في مكان
قضيت فيه اكثر من ساعة
استمع إلي كاثرين
تغني بنفس البطئ
اقف كما اشاء
امر سريعاً
واتوقف كثيراً
اتحدث معي كثيراً
نقاش محترم
بدون صخب
واراء متضاربة

انا بحلم لما بغمض عيني
بكل اللحظات اللي قضيتها وحدي
في معرض الكتاب

المشهد المرعب الوحيد
انا وحدي الساعة 8
مر مشيت وانا قاعدة لوحدي قدام الباب
مستنية آلاء
مفيش درات مفتوحة
ومفيش ناس كتير
وانا متربصة لكل شيء
شكراً للا انك جيت بسرعة
لازم نبطل نخاف من معرض الكتاب
وحدنا بالليل

I believe in good things coming

انا بتقلب سريعا
بين المشاعر
بين الامتنان
والتعاسة
بين الافتقاد
والسعادة

الاشياء السعيدة 
تحدث
ولكننا لسنا مستعدين لها
اترك ما في يدك
وانفض غبار الغضب 
واستعد 
الاشياء السعيدة 
سوف تأتي لك
ستجدك 
ولو كنت مختبئ 
تحت السرير

فاضل 522 يوم 
واتخرج 
: ))))

توثيق للحظات المهمة

يومي كان مزري
وانا بقيت سعيد
شكرا مامت كاثرين
وحماة لويزا
: ))))))
شكرا مر 
رفيقة التوثيق
واللحظات المهمة

الأحد، 24 يناير 2016

I just wanna be loved by you

الجملة دي بتختصر البشرية
كلنا محتاجين حب
ومحتاجين الناس اللي بنحبهم 
يبادلونا الحب

وانا صغيرة مكنتش بحب حد
ومكنش بيفرق معايا 
اذا كان الناس اللي بحبهم
بيبادلوني الحب ولا لا
مكنتش منتظرة الحب

والجملة دي مكنتش شعار المرحلة

الحاجات بتختلف لما بنكبر
وبتكتشف ان كل شيء
انك مستني الناس تتقبلك
ومستني الناس تحبك
ومستني انك تلاقي حد 
لما تعيط

انا اعتقد ان دي قمة تفاهتنا

مش شيء مهم 
انك تكون مبهر
ومش شيء مهم 
ان الناس تبعد عنك
مش شيء مهم انك وحيد
بعد ما قدرت 
تقضي اجازة كاملة
لوحدك
مش مهم 
اذا بادلك الكون الحب
توقف ولا تنتظر الحب

يوم رجل البنك

زي النهارده السنة اللي فاتت
انا نزلت مع رنيما
نطبع رجل البنك
يومي كان عبار عن
ضوء الاباجور
ورق في كل حته
مليان تشطيب
وكتابة بالرصاص
انا ممتنة لرسام
غلاف كتابي جدا
لمدي لطافته معي
ومتشوقة
حقيقي

شيء لا يخصك

انك المفروض
تبطل تدافع
عن مبادئك
عن لبسك
عن اصحابك
او عن مشاعرك
انت مش مضطر
تبرر للاخرين
ومش مضطر تجاوب
الحقيقة
انك مش مضطر تعمل اي شيء
انت مش مقننع بيه
او مش عاوز تعمله
انا بكره الناس
تعمل اي شيء مضطرة
انت محتاج ترسم
خطوط للناس
تبعدهم تماما
عن كل شيء ميخصهومش

الجمعة، 22 يناير 2016

مزيج اليوم

الباند المفضلة
وبطل قصتي الجديد
الشيء اللي انا
مش ناوية اشاركه مع العالم
وبقاوم
اني اعرف حد عليهم

انت تستحق 
ان الحاجات اللي شبهك
تفضل شبهك
وانك متكرهاش لان ببساطة كل الناس بتحبها
والناس اللي مش شبهك
اللي بتحب الحاجات اللي شبهك

تفاهتنا في محاولة البقاء مختلفين
واحنا نسخ من كل من حولنا

الاحلام الجديدة
والتطلعات

كل شيء سعيد
كل ما عليك
ان تظل ممتنا
الحمد الله

ما لنا غيرك يا الله

العمق

الاشياء تصيب الناس كلها
بدون استثناء
ولكن الاشياء ذاتها
لا تؤثر علي البشر
بالقوة ذاتها
والعمق ذاته
لا تسبب الالم بالتساوي
لم اخد حصتي
ولا ارغب ان تؤثر في
الاشياء
بمثل هدا العمق
احمد الله
ان الاشياء التي اصابتني قليلة
وانها لم تؤثر علي
بالقوة ذاتها
يارب شيل من علي قلوبهم
حمل اشياء
لا ذنب لهم فيها

تاريخ الصلاحية انتهي

الحاجات
اللي بتخلينا نؤمن
اننا لا نصلح
ان نقع في الحب
اننا لا نعرف الكثير عن الحب
ان قلوبنا تالفة
اننا لا نصلح للكتابة
الاشياء الجيدة
التي تهز كل عوالمي
تقنعك انك لا تصلح
وانك لا يجب ان تنتظر
لا يجب ان تنتظر اي شيء
الاشياء لم تعد تصلح
ببساطة لانك اهدرت
كل الوقت

حب يساعي الكون

خواطر الاخرين
التي تؤلمنا
بقدر ما تؤلمهم
والرغبة
في ان تنزع قلبك
وتهديه
الرغبة
في ان تتنازل عن
كل ما ستملك من السعادة
وان تعطي
كل ما ملكت من سعادة
للقلوب الاخرين المكسورة
بالتساوي
يارب متخليناش نكسر قلوب
اكتر من كده
ومتخليش حد يكسرلنا قلوبنا
واديني القدرة اننا نكون
شفاء للجروح
والقدرة علي امتصاص
الاسود والالم
القدرة
اننا نكون سعادة
والقدرة علي التواجد
علي طول الخط
مع الزعلانين
اؤمن ان قلبي يتسع للعالم كله

الانتظار

انا عاوزة 
انضف اوضتي
اوضب اشيائي كلها
وارص الحاجات
الشيل التراب
وافتتح الغرفة
الشتا في الاوضة
اسوء شيء ممكن يحصلك
انا عاوزة انام في الاوضة
في سريري
بتاع 15 يوم
مش عاوزة اقوم
عاوزة ابحلق في السقف
واتفرج علي افلام
واقعد اعيط بالليل
وابقي دراما كوين
وطلع كل شيء نفسي فيه
من مشاعر
عاوزة اكتب ع الحيطة
واقرا كتب
وافضل اكلم نفسي
عاوزة اصحي 
الفجر 
وانام في اي وقت
احفظ قران
وافضل اسمع كتير كتير
واعذب مخي معايا
عاوزة اقعد اتف علي كل ما سبق

التفكير

الاشياء التي لا تنتهي
واللي قضينا
الاجازة كلها
نحاول لم نحاول
احاول ان افهم 
كل شيء 
كل التفاصيل
وحدي تماما
من غير مر 
من غير للا
في الغرفة الجديدة

انا قضيت الصيف كله
وحدي بفكر

والتفكير لم ينتهي
التفكير لا ينتهي ابدا

الخميس، 21 يناير 2016

ايه اللي ممكن يخلي اتنين ميقعوش في الحب!!

كنت بفكر في سؤال مريب جدا
بيقول ايه ممكن يخلي شخصيتين
ميقعوش في حب بعض خالص
اول شيء فكرت فيه
الكره
وبعدان اكتشفت ان دي اسهل شيء
وده بيحصل في كل المسلسلات
الظروف المحيطة مش عامل صعب

دايما الناس اللي بتكره بعض بيقعوا في حب بعض

ونسيت السؤال 
ونسيت ادور له علي اجابة

الحلم

انا بحلم بمشهد بسيط
مكرر
كل مرة بقفل عيني
بسمع الموسيقي ذاتها
وانا بالفستان نفسه
ادور ادور الدور
لا ادور ابدا وحدي
انا عاوزة اخد الاجازة
ولبس فستان بيدرو
وادور بيه

الثلاثاء، 19 يناير 2016

التفكير

لاني بفكر وانا نايم
اصغب من وانا صاحي
امبارح وانا نايم
كنت بفكر
اني ك رنيم
مش بحمد ربنا كفاية
وان ربنا بيعدي لي الحاجات ع خير
وانا اول ما بتعدي ببدأ اقلق للي بعده
اعتقد اني في موود سيء
بس موود سيء بقالي سنتين
وده شيء مضحك
صحيت الصبح عمالة ادعي ربنا
الحاجات اللي مش هتجيلي
مش اعوزها
ويشيلها من قلبي
والحاجات اللي عاوزاها
وهتجيلي تيجي بسرعة
او يجيلي علامات
انها هتيجي

نصيحة ليا

اصنع كراسة للافكار
#خطط
انا بحاول اتحسن في الكتابة

ولا تعرف ما تفتقد

مازل هناك اشياء
لا اتحدث فيها
مع احد
من فرط ما تحدثت عنها
الاشياء التي تفسدها
الاشياء الجيدة
والاشياء التي تفتقدها
ولا تدري ماذا قد تفعل
وليس لديك ما تفعله
الاشياء ليست سيئة
ولكنك بداخلك وحيد
ولا شيء يملئ
ما بداخلك من فراغ
الحاجات اللي لسه بتجري ورانا
كوحش ياكل الاطفال
للخوف الملازم
وعدم الرغبة في الاستمرار
العواميد اللي بتقع
وبعدان كل شيء بيقع
انا ببقي بائس
لما ببقي عاوز انام

الاثنين، 18 يناير 2016

انا

الفكرة المسيطرة
ان هناك شخصيات حقيقة يمكنك ان تكتب عنهم بدون الحاجه الي صنع المزيد
رجل البنك اللعين كانت عن شخص موجود ولا نعرف عنه اي شيء
والان كل ما يشغل بالي ماذا لو كان البطل شخصية حقيقية ونعرف عنه ما يكفي لنصنع حكاية تشبهنا
ماذا لو كان البطل كالعادة اكثر اختلافا واكثر غرابة من كل من نقابلهم كل يوم
بفتكر كاثي لما كانت بتكتب عن ابطال اوريدي موجودين اعتقد دي كانت اكتر حاجه شبهي في رواية المفضلة
اعتقد انها خطوات عقبال ما تكتسب الشجاعة ان تصنع ما يحلو لك
وانا لست مستعدة

فاضل


خبر سعيد
فاضل 529 يوم واتخرج
انا واقعة في حب ابليكشن
انا مجموعة من الابليكشنز
منها الللي لقيتها ومنها اللي لسه ملقتهاش
اليوم انا لقيت ابليكشن
الكونت دوان
#احلام
اول بوست من ابليكشن البلوجر المريب

الجمعة، 15 يناير 2016

موبيلي الجديد

توثيق
الموبيل الجديد


قلبك

في لحظة  الحقيقة 
خبطتتني
اني مش مستعدة حقا
اشيل اسود في قلبي
اني بدعي لكل الناس
اللي انا اللي علاقتي بيهم انتهت
بحاول مش اشيل 
في قلبي اي ذرات كره

يمكن عيطت جامد
لما اكتشفت 
اني جوايا ذرات غضب
اني جوايا غضب كتير
اتجاه اشخاص كتير
وعتاب كتير
واتصدمت جداً
انك لما بتغفل قلبك
بيتراكم فيه حاجات 
انت عمرك ما كنت عاوزها

اليوم ده انا قررت 
ان الغضب محتاج كله يطلع
محتاج ارجع من غير اي غضب
او ندم من غير اي حاجه

الفكرة كلها انك تنقذ قلبك
الذي غرق في الاسود
وتحاول ان تجعله اقل سواداً

انا دلوقتي بحاول 
احب كل شيء
وخاصة الغرباء
خاصة الناس اللي مفروض اكرهم
او عل الاقل اللي بيكرهوني 

الخميس، 14 يناير 2016

رنيما وانجازات المدرسة

انا امبارح كنت بفكر 
قد ايه انا فخورة بنفسي
اني عديت ترم كامل مع الاطفال
اللي كان عددهم 61 طفل في الفصل
وان الحمد الله العدد كان بيقل كل مرة
وده من فضل ربنا علينا
ومع اطفال مستواهم اقل بكتير جدا من الطبيعي 
مستواهم الدراسي وسنهم اكبر 
بكتير من السن اللي مفروض ادرسله
ومع ثقافة الشتايم العظيمة وسب الدين
والعنف الزائد وعدم احترام الغير
ولكن برغم ده 
انا عديت ترم من غير نوتي كورنر
من غير تايم اوت، واثبتنا نجاح التايم ان
من غير عقاب ومن غير زعيق
طبعا بصوت كتير من التحمس من الفرح ساعات علشان يسمعوني بس مفيش زعيق بغضب مفيش زعيق بعصبية
انا عديت الترم من غير تعليقات سلبية للأطفال من غير ما اقتل اي حاجه في اي حد
واتمني انه من غير ما اثر سلبا علي اي طفل منهم
حتي الولد اللي عنده مشاكل ومش بيشارك معايا ومش بيجي كتير ولما بكلمه بينام علي الطرابيزة وبفضل اقوله انت مش بتحبني ومش بيرد عليا 
بالاهتمام طلع بس محتاج اهتام محتاج حد يفهمه ان اي شيء هو عاوزه محتاج يطلبه واننا هنوافق علي طلباته وقبل ما يطلب يقول لو ممكن او لو سمحت
اني مش هتعامل معاه بعنف واني مش بستعمل الضرب
انا عديت ترم كامل مفيش طفل بيكمل اليوم مضايق من صحبه 
بجلسات المفوضات بتاعتنا وجلسات المصالحة ومبدأ اننا كلنا صحاب ولما بنغلط بنتأسف عادي جدا وبنطلب من بعض بحترام بنسلف حاجات لبعض وبنرجع الحاجات لصحابها
بالاستماع للمشاكل كاملة حتي لو بناخد وقت حتي لو مبيكونش فيه حد غلطان
كنت حبه انهم يعرفوا اني هسمعهم وان كلامهم مهم ومهم انهم يفضلوا مبسوطين طوول اليوم 
برغم ان اول مرة انا كنت قلقانة جدا ان فيه عادات مجمتع وثقافة اهل مش هقدر اغيرها الا
اني بجد مش مصدقة اني عمري ما رجعت بشيء ناقص بديهم مقلمتي يلونوا بالاقلام اللي عاوزينها وبنلعب حرفيا طول اليوم
كانوا بيلموا اشيائي اللي مرمية حرفيا في كل حته في الفصل ويدوهاني ويقفوا يرتبوا وينسقوا الحاجات اللي لعبنا بيها بمنتهي الحب 
انت لو بتحافظ علي اشيائك او مهتم بيها هما تلقائيا بيحفظوا عليها
اخر يوم لما ولد طلب ماية ف انا قولتلهم ممكن اي حد يدي مازن ماية وفي سرعة البرق لقيت تقريبا الولاد كلهم واقفين دايرة حولين مازن بيصلحوا فيه وبيدوه زمزميتهم علشان يشرب.. انا كنت مندهشة 
وكم البنات اللي اتعلموا يربطوا الكروت باساتك مكنش قليل وكان شيء مضحك للابد 
واقتنعوا بالقاعدة اللي بتقول نبص علي الحاجات قبل ما نرجعها مكانها تحت الطربيزة علشان مش ندوس عليها
وده كله بيثبت شيء واحد بس
انك لما بتعامل الناس بحب 
بيبادلوك الحب
ولما بتعاملهم انهم يقدوا يعملوا اي شيء وبتعلموا اي شيء بيتعلموا فعلا وبيكونوا بظبط اللي انت وصفتهم بيه
انك لما بتعاملهم باحترام بيعملوك بنفس القدر من الاحترام
انك مش مضطر انك تقول كل شيء بشكل واضح وصريح
يكفي أنك تكون مثال يستحق انهم يقلدوه
الترم كله تحفيز وتشجيع وتسقيف واحضان وبنبوني وكوكيز 
انا لا اقاوم فرص التشجيع 
ولا اقاوم اني اطبط عليهم
واحبهم طول اليوم
شكرا مجدي وندي وكل الاطفال
انا بحبكم حب كتير
ومبسوطة انكم اثبتولي 
ان اقدر اكون بظبط
زي ما بحلم اكون
وانكم تقدروا تكونوا 
بظبط نفس اللي انا عاوزاكم تكونوه
انا درست حاجات كتير الترم ده
ودرست حاجات مهمة
مرينا بتجارب غريبة كتير
زي اننا نلعب بالطين او بالعجين
انا ممتنة انكم كنتم بتبهروا بسرعة
وكنتوا بتحبوا كل الحاجات 
اللي كنا بنعملها سوا
* _ *
انا سعيد للغاية
بوست من الدرافت 
بقاله فترة عاوز يتنشر

النهاردة اجازة

النهاردة يوم اللعب
عادة الناس 
مش بتذاكر يوم ما بترجع من الامتحان
الا انا 
انا بذاكر وابدأ اعيط 
علشان الحق اعيط تاني
النهاردة رسمياً اجازة
ومعنديش حاجه اذاكرها
مامتي جاية بالليل
وانا هعمل بارتي
بارتي فيها تنضيف 
بس استيل بارتي 
* _ *

الثلاثاء، 12 يناير 2016

لغات الحب

انا السنة اللي فاتت
كان فيه اختبار 
اسمه لغات الحب
انا عرفت ال3 لغات بتوعي
وكانوا بالترتيب
الوقت - اللمس - التقدير
واكتشفت السنة دي
ان كل شيء
بيدور حول لغات الحب بتاعتي
انا بقدر الحب بالوقت اللي بتقضيه معايا
لو انت مش بتقضي معايا وقت كتير
بحس انك بتهرب مني وانت مش بتحبني
بحب الناس اللي بتحب تقعد معايا
وبحب الناس الي مش بتزهق مني
ووقتهم كله ليا
ودول ناس ليست كثيرة في هذا العالم
وده كان اكتشاف الشهر اللي فات
النهاردة اكتشفت
ان لغة اللمس كاللغة الحب
بتخليني احس اني اقدر اكون معالج
واني اقدر امتص التعب والزعل
انا بحب اطبطب علي الناس جداً
وبحب ابعتلهم حب كتير
واتمني لهم كل السعادة
وانا بطبط عليهم
وعلشان كده ده المشهد اللي بتكرر
علشان لغة اللمس مهمة
اما التقدير
انا بحس
كل الناس بتحب التقدير
بتحب تحس انها عملت اشياء كويسة
وعملت اشياء  نالت اعجاب الاخرين

المفروض ان لغات الحب
بتخلينا نفهم بعض
ونقدر بعض 
اننا مش كلنا بنحب بنفس الطريقة
وان انت عمرك ما هتحس انك 
محبوب غير لما حد يحسسك بكده
من خلال لغتك انت مش لغته هو

لغات الحب بتخلينا عارفين 
احنا بنعمل حاجات غريبة ليه
وبنحس بحاجات غريبة ليه
وبترتب لينا اولوياتنا في الحياة
ِ

المشهد المكرر

مشهد واحد بس
وانا بحاول 
اسحب كل حاجه مضايقة
طنط غادة
وعمالة اقنع نفسي
اني اقدر اكون
معالج
اني اقدر امتص الزعل
وانا عمالة  اعيط
ومش بحاول معيطش
ومش عارفة اوقف عياط
وانا بدرك الحقيقة
ان كلنا مثقلين

مشكلة اليوم

الحاجات اللي بنعديها
وبندفنها
فببساطة بتطلع تجري ورانا
الاحساس الغير طبيعي
بالثقل 
وان مفيش حد يقدر يستحملنا
ان الناس بتهرب مننا
او هتهرب مننا
انك مش شخص مبهر كفاية
انك تبهر اي حد وتقدر تقنعه
يفضل معاك للابد
انك وحيد اجباري
وانك لما بتثقل 
وتقرر انك تدور علي حد
يرمي من عليك الثقل
بتحس انهم هيهربوا منك
وعمرهم ما هيجوا تاني
اذا كنت لم تستطع الاحتفاظ بالاشخاص 
وانت خفيف 
ازاي هتعرف وانت مثقل
ايوا الواحد بيحتاج الناس تفضل تقوله
انها بتحبه كتير
وبيحتاج الناس يفضلوا معاه للابد
اعتقد ان هي دي المشكلة
ان كل الناس محتاجة
الناس تحبها

يارب ارزقنا المزيد من الحب
الذي يكفينا
وارزقنا بناس تفضل معانا وتستحملنا
يارب انا عاوزة ابقي خفيف
انا عاوزة ابقي سعيد
انا عاوزة ماما

التعلق

انا محتاجة اتعلق
ب اي شيء
محتاجة اتعلق في شيئ 
محتاج يتعلق بيا


الاثنين، 11 يناير 2016

أنا : (

انا 
قطة عدت جمبها 
عربية مسرعة 
فوق بركة ماية 
ساقعة ومش نضيفة
انا قطة مبلولة
في عز الشتا
بتعيط في الشارع

انا محتاجة تعاطف
ومحتاجة شوية حاجات كتير

فاضل تقريبا 3 ايام

انا عاوزة ماما
وبدور علي اي حد
يقدر يقلل الفزع 
يقدر يشيل عني الخوف
ومعتقدش ده شيء ممكن يحصل
وده شيء محبط اكتر
الحاجات بتعدي 
والحاجات بتعدي علي خير
بس انت بتخلص عقبال ما تعدي

انا عاوزة حاجات كانت موجودة
طيب احنا ليه سبناها تمشي

انا عاوزة ماما 

انا مش مؤمنة اني فيه اي حد يقدر
يستحملني 
انا مفرط في الثقل

الجمعة، 8 يناير 2016

7 ايام

فاضل 7 ايام
والحياة مسخت اوي
انا عادة بختار الوحدة
ولكن لا اجبر عليها
النهاردة انا وحدي
علي هذا الجانب من العالم
افتقد امي وابكي
النهاردة يوم سيء
ملوش لازمة 
النهاردة يوم محبش اكرره تاني 

الاعتياد

ما يعتاده الانسان ويصبح مألوف لكثرة تكراره
حتما سنعتاد الاشياء ولو بعد حين
وسنتوقف عن انتظار المعحزات

الخميس، 7 يناير 2016

رنيما ومعرض الكتاب

انا لما بغمض عيني
وبحلم اني في معرض الكتاب
مبقيتش بحلم باي حد يكون معايا
وانا كنت بخاف ابقي لوحدي هناك
ملهاش اي اسباب مقنعة
جست شيء جوه قلبي
انا مبقيتش بخاف 
وبقيت بستمتع لوحدي بمعرض الكتاب
بسمع اشياء مالوفة مش بكلم حد 
واحيانا كثيرة بكلم نفسي
بمشي بدون توقف
وبقرر انا هروح فين 
بفوت دارات من غير ما ابرر اسبابي
وبدخل اماكن مش مهمة ومبحسش
اني بضيع وقت حد
باضطر انقي كتبي لنفسي من غير ما ادور علي حد يقرأ لي اللي علي ضهر الكتاب
والمرات القليلة اللي بيبقي اليوم ماشي في هدوء وانا بفكر بصوت واطي  
ببقي انا زي ما انا عادة بتخيلني
اكثر هدوء 
انا بتتطلع اني اشوف كل الناس اللي بشوفهم هناك والمكان الوحيد اللي بيجمعني بصحابي 
بس هبطل ادور علي ناس يجوا معايا وهبطل افوت اروح علشان مبقاش لوحدي البوست ده مش اسمه رنيما ومعرض الكتاب .. اسمه هاو تو بي الوون
: ) 
انا وانا كبيرة جدا جدا

الاثنين، 4 يناير 2016

4-1-2016

انا ساعات كتير
بفكر هيحصل ايه
لو بطلنا نهتم
لو قررنا نوقف
وقررنا نبطل
وقررنا نعيش زي غيرنا
ونموت زي غيرنا

انا عاوزة
ابقي واثقة زيادة في ربنا
انه عمره ما هيظلمنا
وانه علي طول الخط
هيعوضنا في اشياء اخري

من منا لا يحتاج
من يبكي علي كتفه
ويحكي له عن كل شيء
عن المعضلات
والصعوبات
والمشاكل النفسية
الاشياء التي قد تراها تافهه جداً
وفي الوقت ذاته هي لن تكون تافه بالنسبة لك

الجمعة، 1 يناير 2016

الاشياء كلها
 تبادلك
نفس القدر 
من الحب 

القدرة علي التعاطف والحب

اكتشفت ان امبارح
ان فيه قدرة مش عند كل الناس
هي القدرة علي التعاطف والحب
 للاطفال 
الذين لا يجدون من يعلمهم
او بنظفهم، او بهتم بهم
للاطفال 
المفرطون في السمنة
والاطفال
الذين لا يجدوا من يطعمهم
يارب
ارزقنا قلب
يقدر يتعاطف مع الاخرين
علي طول الخط 
يقدر يخلق اعذار
لمن لا اعذار لهم 
مها كانوا 
مهما كانت تصرفاتهم
مهما كان شكلهم 
وقلب يقدر يحب 
كل حاجه علي وجه الكوكب
كل شخص علي وجه الكوكب
بضعفهم، انانيتهم
القدرة علي تغير الكون
بدون ادني اذي 
بدون ادني صوت او دوشة
اننا نكون خفاف علي الناس
وان ربنا يدينا القدرة
علي ان نكون التغير الذي نريد ان نراه في هذا الكون

*الدوشة كلمة عربية فصحة وانا لقيتها في المعجم“تحبین الأطفال ؟.. برافو .. لكنھم طبعًا ھؤلاء الأطفال الذين يظھرون على علب الألبان الصناعیة .. لو استطعت أن تحبي طفلاً قذرًا فقیرًا مبلل الثیاب يتزاحم الذباب والمخاط حول وجھه فأنا أقر لك بأنك أنثى كاملة..” 
احمد خالد توفيق

عنوان حلقتنا السنة دي

التمسك بالاصدقاء
الذين لا يرحلون

2016

انا فقدت احساسي
بكل الوقت اللي في السنة
بالبديات الجديدة
وبالساعات التي تصنع الفرق
الاشياء تشبه بعضها
رنيم ايه حلمك ل 2016
اني اخلص كلية
بس انا هخلص كلية في 2017
انا حرفياً
عاوزة اعيش
عاوزة حاجات كتير كالعادة
بس عاوزة اطلع سليمة من السنة دي