.

.

الجمعة، 31 ديسمبر 2010

حاجات حاوة كتير


الكام يوم اللي فاتوا انا اتعلمت حاجات كتير
1 -عرفت إزاي بتكون السعادة  لما تساعد حد ويفضل يدعيلك, لما تدي الوردة اللي كنت جيبها لنفسك لست عجوزة محتاجة وتبتسم لها اكبر ابتسامة ,لما تلقي بنت صغيرة في المترو وتسألها اسمها ايه ولما تعرف انه نفسها في عصير فتقولها طيب استني هطلع اعدي الشارع واجبلك عصير وهاجي استنيني وتطلع جري وتروح تجبلها العصير وترجع تديهولها.
2 -عرفت إزاي  ممكن تلعب في ماية المطر وتجري تحتها مع أني طول الوقت بعمل كده بس دايما بكون لوحدي مش بيبقي معايا صحابي ولا بتكون الماية برمل وطين وعرفت قد ايه انك تقعد بجزمة وشارب ممبلولين حاجة مقرفة وان القعاد من غير جزمة في المدرسة حاجة مريحة.
3 -عرفت إزاي حاجات صغيرة كتير ممكن تخليك من السعادة تطير.
4-عرفت إزاي اختار ألوان الدهان معاهم اصل احنا دهنا مدخل بتنا.
5 -عرفت إزاي تقدر تمشي في الشارع وتضحك بصوت عالي طول الطريق من قلبك ومن غير سبب.
6-عرفت إزاي تهرب من المدرسين وتستخبا منهم و إزاي ممكن تزوغ من حصص الفاضية كمان وعرفت إزاي ممكن ادخل اي فصل اقولهم "ممكن اقعد  عندكم شوية".
7- عرفت قد إيه الصحاب دول حاجات حلوة.
8-عرفت إزاي ممكن تعدي شارع الهرم جري وانت مسخسخ من الضحك وبتحاول تفضل عيونك مغمضة .
9-عرفت إزاي ممكن حاجات تبسطك علشان انت عاوز تبسط ونفس الحاجات تدايقك علشان انت عاوز تدايق.
-10 عرفت إزاي ممكن تكتئب مع ان كل حاجه حوليك حلوة وعرفت إزاي بيكون انفجار الكلمات جواك لدرجة تبقي مش ملاحق تكتب ايه ولا ايه.
11 -عرفت إزاي ممكن اطلع السلالم تاني بالمشقلب لكن في مصر وإزاي ممكن عيون الناس تقولك انك اكيد اتجننت .
12 -عرفت إزاي ممكن نفس الاغنية لام كلثوم يخليك  مرة تضحك ومرة تعيط.
13 -عرفت قد إيه كانت فكرة مش حلوة لما قررت اكتب مين اللي انا متاكدة انه هيعيط عليا لما اموت بعد الشر عني.
14 -عرفت إزاي ممكن تدخل الامتحان وأنت مش عارف حاجة ف اي حاجة.
15 -عرفت قد ايه حاجة حلوة انك تقول لحد ايه أنت بتحبه وقد ايه حاجة احلي لما تحققله احلامه وبعدان تلقي علي وشه اكبر ابتسامة لدرجة انك ممكن تشوف طقم سنانه كله.
16-عرفت إزاي ممكن اطلع المسمار بالكماشة مش بالمفك.
17-عرفت إزاي بتكون سقعان ولابس صيفي واقعد فوق الشباك والهوا من قوته بيطير شعرك وبرضوا متنزلش تجيب الجاكيت مع انه جنبك.
 18-عرفت إزاي ممكن اقنع نفسي اني عندي قوة خارقة وإني بسمع افكار الناس.
19 -عرفت إزاي ارجع اتخيل تاني بعد ما بقتش اعرف وازاي اقدر اتحكم في احلامي.
20- عرفت إزاي ممكن يكون حد بيحبك و أنت بتحبه وهو مش بيسأل عليك ومع ذلك أنت بتدعيله كل يوم قبل ما تنام.

الأحد، 12 ديسمبر 2010

ستحل عليك لعنة رع


مازلت طفلة أحب لفت الأنتباة إليٍ 
ستحل عليك لعنة رع 
إذا لم تقول لي احبك بأعلي صوت
إذا لم تقم بأهدائي نجمة من السماء 
إذا لم تعلمني الطيران
إذا لم تفعلل كل ما يسعدني
إلا تعرف أن رع يغضب بغضبي 
ويلعن من يغضبني 

الاثنين، 6 ديسمبر 2010


بص لفوق ... شايف إيه ؟
شايف السما جوه عنيك
بص كمان .... هتلاقي إيه ؟
هتلاقي عصافير بتطير حوليك
بص كمان .... شايف التفصيل ؟
شايف جناحات الطير
وهو بيحركها يمين وشمال
وعمال يتباهي بين الناس
بص وركز ... شايف الألوان ؟
كأنها لوحة جميلة
مرسومة بإتقان
بص لأبعد حاجه لفوق ... شايف إيه؟
شايف السحاب
وهو بيخترع الأشكال
بص كمان ...
شايف الشمس وهي بتضحك
شايف اشعتها الصفرا
حاسس بإيه ؟
حاسس بدفا اللي مالي قليك
بص لفوق ...
علشان تضحك
بص كمان ...
واضحك اكتر
أفضل اضحك ...
صدقني هتكون الأفضل
بص لتحت ...
وكمل ضحك
هتلاقي الناس أفضل

عينيك هتشوف كل حاجه حلوة
الدنيا جميلة
والناس احلي
وكل حاجه حوليك بتضحك
السما والشمس والسحاب والعصافير والورد والناس
وأنت لسه بتضحك.